artifice tres grande, que pour me recognoistre deffaillant en la plus forte et principale raison qui me seroit bien necessaire. Car le differend duquel nous disputons est fondé sur le seul poinct : à sçavoir, qui de nous deux se sçaura mieux faire aymer à cette belle Diane que nous avons esleue pour le centre où tous nos services et toutes nos affections doivent tendre. Voilà le poinct que nous allons cherchant, et qui est si mal-aisé d’estre approché, que je le tiens presque impossible, s’il ne plaist au grand Tautates de se monstrer aussi bien Tharamis, en purifiant de sorte mon amour, et la nettoyant si bien de toute imperfection qu’elle puisse meriter d’estre offerte à cette belle Diane, qu’il s’est faict paroistre Hesus, c’est à dire puissant, en la rendant si belle, et si parfaicte qu’il n’y a rien parmy les mortels qui puisse égaler ny sa beauté, ny sa perfection. Peut-estre vous pourriez-vous estonner, ma maistresse, qu’estant en ce lieu si sainct et dedié à la deesse de la justice, et en la presence de la plus chere et familiere amie d’une juste Astrée, j’ose pretendre un favorable jugement, puis que j’advoue que cette raison principale et plus necessaire me deffaut.
Mais oyez, s’il vous plaist, mon juge, surquoy je fonde ma juste pretention. Le propre de la justice n’est pas seulement de juger rigoureusement selon les loix qui nous sont données, mais apres avoir consideré la veritable puissance de chasque chose, establir avec
