que ceux de Silvandre ayent le nom d’importunité, et non pas les vostres qui procedent tous d’une mesme cause ?
Silvandre, mettant un genouil en terre, et prenant la main de Diane, la luy baisa pour remerciement d’une si juste et favorable response ; et luy, se relevant : Ma maistresse, luy dit-il, cette bergere, ne sçachant que c’est que d’aimer, et voyant bien que plus elle va continuant, et plus elle monstre les deffauts de son affection, a pensé que ce luy seroit advantage de veoir finir une preuve en laquelle elle s’acquitte si mal. Car quelle autre occasion, continua-t’il, se tournant vers Phillis, vous pourroit convier de parler de cette sorte à nostre maistresse, puis que les services que vous luy reprochez sont si petits, que la gloire qu’ils meritent n’en peut estre guiere plus grande, et la crainte encore moindre que, comme vous dites, elle doit avoir de me perdre, estans tres-asseurée que, tant que je vivray, elle ne me perdra jamais ? – C’est ainsi, répondit Phillis, que le soldat peu courageux fuit les occasions du peril ; et, au contraire, c’est comme moy que le vaillant athlete recherche les plus dangereuses, et perilleuses rencontres, à fin de donner à chacun tesmoignage de ce qu’il vaut. Car si ce n’estoit ce que je dis, pourquoy esloigneriez-vous, peureux soldat que vous estes, le hazard de ce jugement qui doit rendre preuve de l’advantage que nous avons l’un sur l’autre ? Et si Diane ne le
