de ce boccage sacré.
Mais le disner finy, et le soleil estant encores trop haut pour se pouvoir mettre en chemin, afin d’aller au grand pré où toute la troupe des bergers ou bergeres devoit se rendre pour les jeux rustiques qu’on avoit accoustumé de faire apres les sacrifices, Adamas eut opinion que la chaleur du jour se passeroit plus aisément aupres de la fraischeur de cette fontaine, si l’on y pouvoit trouver quelque honneste divertissement. Et se souvenant du jugement que Diane estoit obligée de faire sur la recherche de Silvandre et de Phillis, il pensa que le temps et l’occasion estoient tres à propos maintenant, et d’autant plus que Daphnide, qui ne s’arrestoit en ceste contrée que pour avoir plus de cognoissance de la douce vie de ces bergers et bergeres, seroit bien aise d’ouyr ce different, et le jugement que Diane en donneroit.
Il vint donc trouver Astrée et Phillis, et leur ayant fait entendre son dessein, il les pria de vouloir joindre leur credit avec ses prieres, pour faire que Diane y consentist. – Je m’asseure, respondit Astrée, qu’il ne l’en faudra guere soliciter, car je sçay que ce qui l’a fait retarder si long-temps, ç’a esté qu’il nous a semblé à toutes qu’il n’estoit pas raisonnable que ce jugement se donnast hors de la presence de la nymphe Leonide, puis qu’en ayant veu le commencement, il sembloit qu’elle deust aussi assister à la fin ; mais j’ay peur que si Silvandre s’en appercevoit, il ne nous rompe bien tost compagnie.
