dernier Article.==
Adjousté par advis et conseil, aux conditions avec lesquelles Hylas et Stelle promettent de s’aymer à l’advenir, et lequel ils jurent d’observer le plus religieusement.
Que toutesfois nous, Stelle et Hylas, sommes si soigneux de nostre liberté, et tant ennemis de toutes sortes de contraintes, qu’il nous sera permis, quand bon nous semblera, de n’observer une seule de toutes les conditions cy-dessus escrites et accordées.
Ainsi termina le different de ces gentils bergers, avec le contentement de tous, par le sage advis du druide, non point sans plusieurs plaisans discours sur ce propos et l’opinion que la plus-part eut que cette amitié seroit de durée, puis que ny l’une ny l’autre des parties n’avoit dequoy se plaindre. Corilas, les voyant ensemble, et se tenir par les mains, en signe de leur contentement : Or va, dit-il, Stelle, te voilà arrivée où ton humeur te devoit avoir conduite il y a long-temps ! Et toy ! Hylas, tu peux dire qu’apres avoir longuement cherché, tu as trouvé ce qui t’estoit necessaire, et je recognois que veritablement le Ciel est juste
