me fusse arrestée icy, si j’eusse pensé que vous y fussiez demeuré ? – Ceste reproche n’est pas raisonnable, respondit Hylas. Que sçay-je si le Dieu à qui ce bois est consacré, a agreable que j’y entre ? ne voyez-vous ce qui est escrit sur ceste porte ?
Alors Alexis feignant de n’y avoir encore prins garde, elle y tourna les yeux, et vit en escrit.
Loing, bien loing, prophanes esprits,
Qui n’est d’un sainct amour espris,
En ce lieu sainct ne fasse entrée :
Voicy le bois où chaque jour
Un cœur qui ne vit que d’amour
Adore la déesse Astrée.
– Et que voulez-vous dire par là ? continua Alexis. – Il veut dire, interrompit Silvandre, que, n’estant point espris d’un sainct amour, il n’ose mettre le pied en ce lieu sacré, de peur de le prophaner, et en cela, madame, il se monstre plus religieux que parfaict amant. – Est-il possible, mon serviteur, reprit Alexis, que Silvandre ait dit la verité ? – Ma maistresse, respondit Hylas tout en colere, avez-vous envie que je vous ayme plus que je n’ay fait jusques icy ? – J’en serois bien aise, dit Alexis. – Esloignez donc de vous, dit-il,
