Page:Urfé - L’Astrée, Troisième partie, 1631.djvu/833

voulurent mettre en leur troupe, ne demeurant dans le temple d’Astrée qu’Adamas avec Daphnide, Alcidon et les bergers et bergeres qui estoient venus de compagnie. Et parce que Daphnide qui estoit accoustumée de voir faire les sacrifices à la façon des Romains, estoit curieuse de sçavoir pourquoy l’on usoit en cette contrée d’autres ceremonies : Madame, luy dit-il, encore que cette contrée des Segusiens que nous appellons FOREST, soit en son estendue des plus petites de la Gaule, si est-ce que le grand Dieu monstre d’en avoir un plus grand soing, car sans parler des autres, les Galloligures, qui est ceste contrée que communément l’on nomme à ceste heure la Province des Romains, d’autant qu’elle a eu une si grande affinité avec les Romains, et que ses principales villes sont colonies des Focenses peuples Grecs, et adonnez à la pluralité des dieux, encores que dés le commencement, comme Gaulois, ils n’eussent que la religion de nos peres, toutesfois, ainsi que l’abus peu à peu se va coulant en toutes choses, de mesme ont-ils laissé glisser parmy leurs ceremonies et leurs sacrifices les fausses et idolatres opinions de ces divers peuples, et ont faict un meslange de la religion des Gaulois, des Romains et des Grecs, qui les rend non seulement differents de l’ancienne, mais aussi de toutes les autres desquelles elle a esté corrompue. Au contraire, cette petite contrée de Forests,