à haute voix, et lentement les paroles qu’une vestale luy disoit mot à mot, qu’elle lisoit dans un livre, de peur d’y faillir, ou de les mal prononcer ; car lors que cela arrivoit, elles croyoient que les sacrifices n’estoient pas aggreables à la déesse, et les faisoit recommencer. Les paroles estoient telles :
O redoutable déesse, fille de la grande Rhée, et du puissant Saturne, qui nourris et eslevas Jupiter en ton giron, lors que sa mere le tenoit caché ! Vesta que les Thirreniens appellent Labith Horchia, et qui es la premiere et la derniere engendrée de toy, reçoy cette devote immolation que nous faisons pour le peuple et Senat Romain, pour la conservation des Gaulois, et pour la grandeur et prosperité d’Amasis nostre Dame souveraine. Et nous fay la grace que ton feu qui est en nostre garde, ne s’esteigne jamais, et que la requeste qu’apres la victoire obtenue sur les Titans tu fis au grand Jupiter d’estre tousjours vierge, ait aussi bien esté obtenue pour nous que pour toy, puis qu’estans toutes à toy, nous pouvons aussi avec raison estre estimées une partie de toy mesme.
Aux dernieres paroles de cette supplication, tout le chœur des vierges respondit : Qu’il soit ainsi. Et lors elle posa la Mole-sacrée sur l’autel, puis le panier de fleurs, et de fruicts que la vestale qui en avoit la charge luy presenta, et
