de plus, que le lendemain le roy s’en alloit faire un sacrifice au tombeau des deux Amants, en esperance qu’ils luy seroient propices envers le grand. Tautates, pour changer le cœur de Cryseide, et la faire consentir à ce qu’il desiroit. Et que pour le rendre plus solemnel, il vouloit qu’elle y assistast, et toutes les autres dames prisonnieres.
Arimant fut fort aise de cette nouvelle et luy sembla que c’estoit un bon augure pour luy, qu’il se fust rencontré à cette occasion, II ne manqua donc point de se tenir prest le lendemain. Et cependant, le roy ne cessoit de rechercher cette belle fille, luy representant tout ce qui pouvoit la persuader de luy complaire. Mais elle, plus ferme en sa resolution qu’un rocher contre les flots de la mer, ne peut jamais estre esbranlée. Cela fut cause qu’il pensa, avant que de venir à la force, de recourir au secours de Tharamis, et par sacrifices, obtenir de luy cette grace de changer le cœur de cette genereuse fille. Et parce qu’il la pria d’y vouloir assister, elle y consentit librement : M’asseurant, dit-elle, que si ce dieu Tharamis est juste, il vous ostera la volonté de faire une si grande injustice.
Le lendemain le sacrifice estant prest à se faire, il la fit monter dans un somptueux chariot, la contraignit de porter la couronne royale, et la fit suivre pompeusement par toutes les autres ses compagnes, comme si desja elle eust esté royne des
