en fit de tels vers que depuis il faisoit souvent chanter par ceux de sa musique.
MADRIGAL
Chasse d’Amour.
Je m’en vay nuict et jour
A la chasse d’Amour
Mais chasse bien estrange
Qui me deçoit et change
En ce que je poursuis !
Puis qu’ayant bien chassé, l’Amour veut que je soye
Blessé, non le blesseur ; chasseur, non, mais la proye.
Lors que Cryseide fut prise, Clarine se fust bien sauvée, si elle eust voulu, aussi bien que celuy qui leur servoit de guide, mais ne la voulant abandonner, elle la suivit volontairement. Et de cette sorte la triste Cryseide fut ramenée à Lyon, et remise avec les autres dames prisonnieres, mais avec une plus soigneuse garde qu’elle n’avoit eu auparavant ; quoy que le roy, qui veritablement avoit dessein de l’espouser, tant pour sa beauté que pour estre proche parente de la femme de Rithimer, sœur de l’empereur Anthemius, eust commandé
