entre ses bras. Dans le milieu du temple estoient posez les deux autres autels avec une si juste distance, que l’un n’estoit point plus eloigné du milieu que l’autre. Aux costez de chacun, il y avoit un petit arc de marbre blanc, soustenu de trois colonnes, sur lesquelles on mettait les premices et les fruicts avant que de les offrir. A la porte il y avait un vaze où ils tenoient l’eau qu’ils nommoient lustrale, en laquelle la torche qui servoit à l’autel quand ils avoient celebre les choses divines, avoit esté premierement esteinte.
Lorsque cette troupe fut rencontrée par la venerable Chrisante, il estoit si matin, que les sacrifices journaliers n’estoient pas commencez ; ce qui faut cause qu’apres les premieres salutations, elle y convia ces belles bergeres, disant aux bergers, qu’elle estoit bien marrie de leur oster cette aggreable compagnie, mais qu’elle y estoit contrainte par l’ordonnance de la déesse, qui vouloit que les hommes fussent bannis de ses autels.
Paris, Calidon et Silvandre qui y avoient le plus d’interest, respondirent qu’ils estoient bien en colere contre le peu de merite des hommes, puis qu’il estoit cause que leurs déesses ne les avoient pas jugez dignes d’assister à leurs sacrifices, qu’ils ne laisseroient cependant de les supplier de se contenter de leur faire ce mal, et qu’elles ne missent de mesme dans les cœurs de leurs bergeres une semblable
