Page:Urfé - L’Astrée, Troisième partie, 1631.djvu/771

l’heure, ne manqua point de sortir hors du lict, feignant de vouloir aller à la garde-robbe, afin que sa compagne avec laquelle elle couchoit, ne s’en prist garde. Mais d’autant que c’estoit sur le premier sommeil, elle se rendormit, aussi-tost presque qu’elle fut esveillée, si bien que Cryseide et Clarine n’ayant mis qu’un cottillon sur elles, furent incontinent descendues, et sans bruit dans le batteau. Et soudain le poussant au milieu de l’eau, Bellaris qui estoit seul pour conducteur, le laissa emporter au courant de la riviere sans ramer. Et la fortune fut si bonne pour luy, qu’encores qu’un bon battelier eust esté assez empesché la nuict de rencontrer si justement le batteau qui estoit à demy destaché, toutesfois il n’y manqua point, et sautant dessus avec des tenailles, et le moins de bruit qu’il peut, de peur que les gardes ne l’ouyssent, acheva d’en destacher les anneaux, et apres fit couler le batteau par dessous la chaine qui n’estant plus soustenue, de sa pesanteur s’enfonça si avant dans l’eau, qu’elle donna passage au batteau de Cryseide, qui, n’estant guere chargé, passa aisément dessus et de cette sorte sortit hors de l’enclos de la ville. Mais incontinent apres, il faillit de se perdre, car le Rhosne dans lequel l’Arar entre est si impetueux, qu’il esmeut des vagues assez fascheuses pour les petits batteaux, et d’autant plus y ayant un si mauvais battelier. Toutesfois enfin, il s’efforça tant qu’il gaigna la rive et quoy que ce fust