qu’il y ait quelqu’un qui le vueille raconter, je seray bien aise de luy donner audience ; mais si vous attendez quelque chose de plus de moy, je sçay bien que vous vous trompez, ou pour le moins que je n’ay plus rien à vous dire.
Toute la compagnie fit un esclat de rire qui ne fut pas petit pour se voir deceue de son attente. Et Alexis, prenant la parole : Comment, mon-serviteur, dit-elle, pensez-vous vous estre acquité de la promesse que vous nous aviez faicte ? Vous nous aviez promis de raconter vos diverses amours, et vous n’avez parlé que des infortunes de Cryseide, et du mal-heureux Arimant.
Il me semble qu’en cecy, nous ayant dit ce que vous ne nous aviez pas promis, et ayant laissé à dire ce que vous estiez obligé de nous raconter, vous avez fait comme ceux qui ayment mieux donner ce qu’ils ne doivent pas, que de s’acquitter de leurs debtes et obligations.
Hylas, oyant ce reproche, demeura quelque temps sans rien dire, et sousrioit en soy-mesme, luy semblant, lors qu’il repensoit bien à ce qu’il avoit promis, et à ce qu’il venoit de leur raconter, qu’Alexis avoit raison. Enfin, relevant les yeux : Ma maistresse, luy dit-il, je voy bien maintenant que j’ay faict ce que vous dites, mais je trouve que la faute a esté de vostre costé, car si la monnoye que je vous ay donnée n’estoit pas bonne, pourquoy ne la refusiez-vous ? Je veux dire que quand vous avez recogneu que je
