en vois si peu, qu’il faut de necessité attendre si le Ciel ne nous en presentera point quelqu’un.
– Peut-estre, adjoustay-je, vous voulez trop choisir ? – pardonnez-moy, me dit-il, mais c’est que veritablement je n’en vois point, car pourveu que je trouvasse une fille noble et vertueuse, et qu’il n’y eust point de reproche en sa race, je ne m’arresterois gueres à sa richesse. – Il me semble, luy dis-je, que vous oubliez l’un des plus grands poincts. – Et lequel ? me respondit-il. – C’est, luy dis-je, qu’ils s’entre-aymassent bien tous deux. – Il est vray, reprit-il incontinent, mais je n’ay point mis ceste condition, parce qu’elle doit estre la premiere presupposée, vous protestant, Cleomire, que j’aymerois mieux la mort, que si je voyois que la necessité de mes affaires contraignist Arimant d’espouser une femme indigne de luy, ou qu’il n’aymast pas, ayant desja rompu un mariage pour avoir recogneu qu’il n’y avoit pas de l’intention. – Vous estes, repliquay-je, vray pere en cela. Mais que diriez-vous, seigneur, si encore qu’estranger, je vous proposois un party en ce pays, où vous trouverez toutes les conditions que vous venez de dire, et qu’il ne tiendra qu’à vous que vous n’ayez quand vous voudrez ? – Je dirois, me respondit-il tout estonné, que vous avez eu plus d’esprit que tant que nous sommes. – Non pas cela, luy dis-je, mais peut-estre plus de commodité de le recognoistre que les autres. Or si vous l’avez agreable, je
