qui, outre l’affection qu’il avoit à son maistre, n’avoit point faute d’esprit, ny de jugement. Il luy communique donc le desir qu’il avoit de me veoir, que jamais il n’auroit ny repos ny contentement qu’il n’eust esté aupres de moy. Que toutesfois Rithimer hayssoit de sorte son pere, qu’il ne sçavoit avec quelle asseurance il pouvoit venir où j’estois, ny moins entrer dans mon logis. Ce jeune homme apres y avoir quelque temps pensé : Seigneur, luy respondit-il, il faut faire de nécessité vertu. Renvoyez ce messager, afin qu’il ne descouvre vostre dessein, et puis desguisez-vous et vous habillez en marchand : vous pouvez entrer dedans la ville, et y demeurer quelque temps sans estre cogneu. Estant sur le lieu, peut-estre se presen-tera-t’il telle commodité, que vous ne sçauriez d’icy vous imaginer. Arimant trouva bonne l’opinion de ce jeune homme, et dés qu’il fut jour, depescha le mien qui le lendemain me rendit sa lettre, et nous dit en quel lieu il l’avoit trouvé, et par quel hazard recogneu.
Je ne vous redis point icy, gentil Hylas, quelle fut sa responce, car vous pouvez juger qu’elle estoit pleine de remerciemens et d’extremes contentemens. Sur la fin il m’asseuroit de me veoir bien tost, quelque fortune qu’il pût courre. Cependant il ne perdit pas le temps, car jugeant qu’il estoit plus à propos de ne s’approcher point du lieu où j’estois sans estre desguisez,
