donner qui responde aux effects que tu produicts en moy ? Et là, s’estant teu quelque temps tenant les yeux fermes sur les paroles de sang, tout à coup en le baisant, il dit : Je t’entends bien, interprete du cœur qui t’envoyé, tu me convies de faire le mesme chemin, je n’ay garde de te refuser, je suis prest à faire ce voyage, je ne me deuls sinon que tu m’ayes voulu devancer, ou pour le moins que nous ne l’ayons faict de compagnie.
Et lors, se tournant vers ce jeune homme : Mais, luy, dit-il, mon amy, tu ne me dis point comment cet accident est arrivé ?
– Seigneur, respondit-il, s’il vous plaist vous donner un peu de repos, et que vous me promettiez que cela ne vous affligera point d’avantage, je vous diray tout ce que j’en sçay. – Non, non, reprit soudain Arimant, il n’y a rien qui puisse agrandir ny diminuer ma douleur, dis-moy seulement tout ce que tu en sçais.
– Je vous diray donc, continua ce jeune homme, que j’arrivay là de bon matin, et que suivant le commandement que vous m’en aviez faict, je pris garde lors que Clarine alloit au temple, où je luy mis la lettre que vous escriviez, si discretement dans la main, que personne ne s’en aperceut, et l’ayant priée de me faire promptement avoir ma responce, elle me dit que ce matin mesme je l’aurois. Incontinent apres j’allay dans le logis de Rithimer, car c’est où elle loge ; mais à peine y fus-je entré, que j’ouys un grand bruit
