Et cela, elle le disoit à cause de l’onguent qui estoit respandu sur le plancher, qui sentoit fort mauvais. – Si fais certes, dit ma nourrice. Mais, continua-t’elle, Clarine, prends le balay, et nettoye-le, autrement il vous pourroit faire mal. Elle qui ne desiroit que ce commandement, prend la pesle, et le plus soigneusement qui luy fust possible, le ramassa, et puis l’alla jetter par la fenestre, et avec de l’eau lava apres le plancher le mieux qu’elle peut.
Mais il faut rire de ce qui advint le lendemain. Cet onguent tomba sur quelque chose de sale qui estoit dans la rue, où un chien passant, et sentant ou l’huile ou la graisse qui estoit en cet onguent, le mangea, mais il ne l’eust pas plustost avalé qu’il tomba comme mort, ou pour le moins tellement endormy, que pour coup qu’on luy donnast, il ne se put esveiller. Clarine qui le vit de la fenestre, et qui s’en douta, luy jetta de l’eau dessus, et si à propos, qu’aussi tost qu’il en fust touché, il se releva, et commença à secouer les oreilles, et à s’estendre, comme le matin, quand il s’esveille : il faut bien que la composition et les drogues en fussent assoupissantes !
Le soir apres, Arimant ne manqua point de venir selon sa coustume avec la musique sous la fenestre, et après avoir quelque temps fait jouer, il chanta tels vers :
Sonnet
