qu’elle tomba à bas du lict, où elle se rompit, et l’onguent qui estoit fort liquide, s’espandit sur le plancher.
C’est une chose estrange que, presque aussitost que la boeste ne fut plus sous le nez à ma nourrice, elle s’esveilla, mais avec la teste si estourdie de cette odeur, qu’elle ne sçavoit ce qu’elle faisoit et, comme je crois, ainsi qu’une personne qui est yvre. Soudain qu’Arimant ouyt donner le coup en terre, il s’en douta, et me dit : Levez-vous, madame, et vous mettez autour de la bonne vieille cependant que je descendray, car infailliblement elle est esveillée. Et à ce mot, il courut vers la fenestre, moy vers le lict, et Clarine vers l’eschelle, et afin de me mettre devant elle, je me jettay sur son lict, et commençay de l’embrasser et serrer contre mon estomach. Et faisant semblant d’avoir peur qu’elle ne mourust du mal qu’elle avoit, je luy disois qu’elle eust bon courage, et que ce ne seroit rien, et envoyay Clarine, qu’elle apportast du vinaigre ou de l’eau, pour l’a faire revenir. Et la sceus de telle façon abuser par mes discours, luy frottant tantost le pouls, et tantost le nez, que je donnay loisir à Arimant de s’en aller, et à Clarine de retirer l’eschelle et la cacher. Et incontinent courant à l’eau, elle en apporta, et lors, faisant les empeschées, nous luy en jettasmes au visage, et l’en mouillasmes de sorte qu’elle eust esté bien endormie si, à faute d’eau, elle ne se fust esveillée.
Et alors, toute estonnée,
