n’eusse eu la mesme intention ; mais d’autant que nous sommes et l’un et l’autre en pouvoir d’autruy, ce n’est pas une promesse que nous puissions ny devions faire si legerement, elle merite bien que l’on y pense. – Comment, reprit-il incontinent, madame, voudriez-vous bien m’avoir faict des faveurs si signalées, pour me refuser celle que je vous demande avec tant de raison ? Resolvez-vous ou de me voir eternellement embrasser vos genoux, ou de m’accorder ma supplication.
Je sousris quand j’ouys ces dernieres paroles, car il les dit avec une certaine action qui monstroit bien qu’il estoit pressé.
Je luy dis toutesfois : Et qui sçait, Arimant, si vous ne vous en repentiriez pas bien-tost, en cas que je vous prisse au mot ? – O Dieu ! dit-il, belle Cryseide, n’offencez point si cruellement et mon affection et vostre beauté. Et afin que vous n’entriez plus en cette doute, j’appelle Hymen et la nopciere Juno, et les prens tous deux pour tesmoings, que je ne seray jamais mary que de la belle Cryseide, et qu’en tesmoignage, je sentis à ce mot, qu’il me vouloit mettre une bague au doigt, qui fut cause que l’interrompant, je retiray la main, et me voulus lever, mais il me retint par force sur le lict, en me disant : Et me voulez-vous rendre parjure, madame, en me faisant oster d’icy où j’ay protesté de demeurer eternellement, si vous n’accomplissez ma requeste ? – Vostre requeste, repris-je incontinent, est injuste, et vostre serment
