moy, belle Cryseide, si je vous offence. Pourquoy ne croyez-vous quand je vous dis que je suis vostre serviteur, puis qu’il est vray ? et pourquoy soupçonnez-vous que je mente, puis que cela n’est pas ? – Arimant, luy dis-je, jamais les paroles seules ne me persuaderont ce que vous dites, puis que la raison desment vos paroles, et puis que je sçay que les hommes font profession d’en donner beaucoup pour peu d’argent. – Si cela est, me dict-il, je proteste que je ne suis pas homme. – Et qu’estes-vous donc ? repliquay-je incontinent. – Vostre serviteur, me respondit-il, et le plus fidele que vous aurez jamais.
J’advoue, Hylas, que sa bonne naissance, son gentil esprit et que c’estoit le premier qui eust commencé de faire cas de moy, m’obligea à luy respondre d’autre sorte que je n’eusse faict, si je n’eusse point eu ces considerations, et qu’elles furent cause qu’en sousriant : Nous verrons, Arimant, luy dis-je, si à la premiere fois que nous nous rencontrerons, vous serez encores de mesme opinion, et c’est en ce temps-là que je remets la response que je vous devrois faire à cette heure.
Le bal se finit en mesme temps, et l'assemblée se separa, car il estoit heure de soupper, et quelque artifice qu’il y peust mettre, je ne voulus luy donner la commodité de parler à moy, me semblant que pour la premiere fois il y avoit dequoy se contenter. Et parce que les resjouyssances
