en plus de liberté, parce que là ils sont tous dans les villes, et par ce moyen en ont toute l’authorité. Entre les autres, il y avoit un jeune chevalier Libicien, favorisé certes de la nature en toutes les graces qu’elle peut donner, ne luy manquant ny noblesse d’ancestres, ny l’alliance des meilleures familles, ny autre bonne condition qui se puisse desirer, horsmis la richesse. Mais en cela, il avoit peu d’obligation à son pere, qui toute sa vie, avoit eu plus de soing d’acquerir de l’honneur que du bien, peu advisé, qui ne scavoit pas que cet honneur là, sans le bien, est comme l’oiseau qui a de bonnes aisles, mais qui ne peut voler pour avoir de trop pesans fardeaux attachez aux pieds !
Ce jeune homme demeuroit dans Eporedes, à cause de la haine que Rhitimer portoit à son pere. Vous avez sceu, Hylas, que Rhitimer, quoy que Goth de nation, par sa valeur et bonne conduite avoit esté faict citoyen de Rome, et puis practicien, et en fin gouverneur de la Gaule Cisalpine, ou plustost seigneur, car l’auctorité qu’il y avoit estoit si absolue que l’on pouvoit plustost l’appeller seigneur que gouverneur. Le pere d’Arymant (c’est ainsi que ce jeune homme s’appelloit) avoit tres-juste occasion de craindre son ennemy, car, encores que tres-vaillant, et tres-accomply d’ailleurs, il avoit toutesfois tousjours du naturel gothique, et cela estoit cause qu’il se tenoit en
