ou pour les charges qu’il y possedoit, ou pour l’authorité qu’il s’estoit acquise, tant pour sa propre consideration, que pour la faveur que luy faisoit Honorius, et depuis Valentinian, et tous ceux qui apres luy ont dominé l’Italie, qui le preferoient de façon que, si la mort ne l’eust prevenu lors que l’Empire est allé en décadence, il se fust sans doute emparé non seulement des Salastes, mais des Libices, des Centrons et des Veragrois aussi, et ceste mort fut le premier coup que, sans estre ressenty de moy, je receus de la fortune. Car n’ayant encore attaint l’age de neuf ans, je ne sçavois que c’estoit de perdre son pere, et demeurer entre les mains d’une mere plus soigneuse de soy-mesme, que de ses enfans. Je vesquis toutesfois avec assez de repos, jusques en l’age de quatorze ou quinze ans, parce, comme je croy, que la fortune ne me jugeoit pas encore capable de ressentir la pesanteur de ses coups. Et voyez comme elle les envenime finement : afin de me les rendre plus mal-aisez, elle voulut les couvrir de quelque apparence du bien, sçachant, la cruelle qu’elle est ! qu’un mal qui vient avec le visage d’un bien, se rend beaucoup plus sensible.
Dans la ville où je demeurois, il y avoit quantité de chevaliers qui de mesme y habitoient ; car la Gaule, qu’en ce pais-la on nomme Cisalpine, n’est pas comme celle-cy, où j’ay ouy dire que les chevaliers habitent par les campagnes pour vivre
