bonne memoire de si peu de chose. Nos dames Gauloises, au contraire, soit par gloire, ou par faute de souvenir, n’oublient pas seulement les petits, mais aussi les plus grands services que l’on puisse leur rendre. – Et comment, me dit-elle, pouvez-vous attribuer cet oubly à gloire ? – Elles ont, respondis-je, une telle opinion de leurs merites, qu’elles estiment chacun estre obligé de les servir ; et recevant tous nos services comme leur estant deus, elle les mesprisent, et les mesprisant, ne daignent pas seulement s’en souvenir. – Vous me depeignez, dit-elle en sousriant, vos dames d’une estrange humeur, mais prenez garde que ce que vous dites ne procede d’une autre occasion ; nostre sexe est tellement la butte de la medisance, que bien souvent nous sommes contraintes de faire semblant de ne voir point des choses que nous voyons, aussi bien que les hommes mesmes, et en cela nous sommes plustost à plaindre qu’à blasmer.
Periandre et Orsinde s’estoient un peu retirez à costé, et expressément nous avoient laissez ensemble, cependant qu’Amasonte entretenoit toutes ces autres estrangeres. Cela fut cause que plus hardiment je luy fis ceste response : Si ces dames que vous excusez si bien, avoient, madame, et le corps et l’esprit comme vous, encore qu’elles eussent beaucoup plus de cruauté, elles n’auroient point toutesfois besoin d’excusé,
