de luy sauver la vie, luy semblant que les autres qui sont plus petits ne meritent d’être mis en compte.
Silvandre, pour ne l’interrompre, ne vouloit point respondre, mais voyant que chacun avoit les yeux tournez sur luy, et que Diane mesme le regardoit, comme attendant quelque chose de luy, il creut d’estre obligé de luy dire : J’avoue, Hylas, et desavoue en partie ce que tu viens de dire de mon humeur ; car tant s’en faut que je ne voulusse faire un moindre service à ma maistresse que de luy sauver la vie, qu’au contraire je prie Tautates que l’occasion ne s’en presente point ; afin qu’elle ne soit jamais touchée, ny mon cœur aussi, d’une si grande et si fascheuse apprehension. Mais j’avoue bien que ces petits services, qui mesme ne meritent point d’avoir tel nom, mais seulement d’estre appellez des soings, qu’autrement n’estans point faicts s’appelleroient nonchalances, ne sont pas dignes d’estre mis au compte que tu fais, puis que les plus grands doivent estre effacez de la memoire de celuy qui les a rendus. Et croy moy, Hylas, qu’à quelque compte que l’amant vienne de ses services avec celle qu’il ayme, c’est un signe tres asseuré qu’il se lasse de la servir, et qu’il luy tarde de n’avoir achevé le prix faict qu’il a commencé. – Et quoy donc, reprit Hylas, en branlant la teste, on doit perdre la memoire d’un long service ? et pourquoy faut-il donc les rendre ? puis que les choses passées, et desquelles
