Page:Urfé - L’Astrée, Troisième partie, 1631.djvu/621

autre fois, mais je cogneus bien qu’il ne l’avoit dict que pour me mettre en peine, parce que peu apres je vis venir celle que j’attendois, la derniere de toutes, accompagnée de tant de beautez, qu’elle attiroit les yeux de chacun sur elle. Cette seconde veue me ravit de telle sorte, que je ne sçay ce que je devins ; seulement, je me ressouviens que quand elle passa au devant de moy, je ne me peus empescher de dire avec un grand souspir : Voilà la plus belle de toutes. Et de fortune il advint que de toutes ces estrangeres, il n’y avoit qu’elle seule qui entendist le langage des Gaulois, de sorte que je l’obligeay aux despens des autres, sans toutesfois aussi les desobliger, parce qu’il n’y eut qu’elle qui m’entendist, d’autant que quelque mine qu’une femme en fasse, c’est une playe presque incurable que le mespris qu’on faict de sa beauté, et au contraire, de toutes les flatteries qui plaisent le plus aux femmes, il n’y en a point qui leur soit plus agreable que celles qui touchent leur beauté parce que jamais leurs jugemens ne desmentent les paroles qui en sont dictes, pour avantageuses qu’elles soient. Le Temple estoit assez esloigné du Palais, et toutesfois je treuvay le chemin si court, que je ne pensois pas en avoir fait la moitié, lors que nous y arrivasmes ; mais ce que je treuvay de plus estrange, ce fut de voir achever si promptement le sacrifice qui y fut faict, qu’à peine pensois-je qu’il fust