point le soleil quand il esclaire ? N’avez-vous point veu ces chariots qui ne font que de passer ? Dans le premier estoit celle que j’aime, et que je ne cognois point. – Si c’est celle-là, me dit-il, incontinent, sçaches, mon amy, que tu es prisonnier d’une prisonniere. Gondebaut, nostre roy, les a prises de là les Alpes, et les envoyé icy pour marque de sa victoire.
J’appris ainsi qui estoit cette belle estrangere, et s’il n’eust esté si tard, j’eusse dés ce soir mesme essayé de la voir, mais le remettant au matin, je me retiray en mon logis, si tourmenté que je ne reposay de toute la nuict. Je sortis du lict au mesme temps que le jour parut. Et parce que Periandre m’avoit promis que nous irions de compagnie au Palais, pour nous trouver lors que ces estrangeres iroient au Temple, attendant qu’il vinst, je pris un miroir pour prendre advis de luy comme ce jour-là je m’habillerois. Cent fois je passay les mains dans mon poil, tantost pour le relever et tantost pour le frizer, et cent fois il me sembla qu’il ne se vouloit tenir si bien que de coustume ; cent fois je mis et remis ma fraize, et je ratachay de tant de sortes mes jarretieres, que le jarret m’en faisoit mal, et laissay tous ceux qui estoient autour de moy à m’accommoder le reste de mon habit.
Mais en fin, quand je revins au miroir, je pris garde que mes cheveux paroissoient un peu trop dorez, et parce que c’est une chose à laquelle il se faut bien prendre garde, de ne
