d’une partie du sein aussi, dont un curieux mouchoir cachoit le reste, et toutesfois, par mesgarde ou à dessein, bien souvent il s’entr’ouvroit ou s’eslevoit selon le bransle du chariot, et laissoit passer l’œil curieux quelquesfois bien avant, pour luy donner, comme je croy, plus de desir de voir le reste par la veue de ce qui luy estoit permis. Pour sa taille, la robe volante la cachoit, et le chariot empeschoit que la hauteur peust estre bien recogneue ; toutesfois, par ce qui s’en voyoit, l’on pouvoit juger qu’elle n’estoit ny grande ny petite. Quant à sa main, que de temps en temps, elle sortoit du gand pour relever les cheveux qui luy tomboient sur les yeux, elle paroissoit telle que rien ne se pouvoit esgaler à la blancheur du visage qu’elle seule.
Or jugez, madame, si ceste beauté pouvoit estre veue sans estre aymée ! aussi fut-ce le feu où je bruslay toutes mes autres brusleures, mais de telle sorte qu’en oubliant Circene, Palinice, Dorinde, et Florice mesme, je me donnay entierement à celle-cy. Peut-estre trouverez-vous estrange qu’estant dans un chariot, et ne faisant que passer, je peusse remarquer tant de particularitez en ceste belle, mais il faut se souvenir que je la regardois avec plus de deux yeux, car outre les miens, j’avois encore ceux d’Amour qu’il me presta afin que je peusse bien veoir ceste merveille. Et ne faut pas croire ce que Silvandre allegue bien souvent que l’Amour est aveugle,
