marrie de le perdre. Mais, belle bergere, dites-moi, je vous supplie, depuis quand est-il parmy vous ? qu’est-ce qui l’y a fait venir, et qui l’y arreste ?
Diane alors luy respondit : II y peut avoir quatre ou cinq lunes qu’il vint, et je croy que de vous dire ce qui l’arreste icy, il est superflu, puis, madame, que vous le pouvez assez imaginer, cognoissant son humeur comme vous faictes. Mais pour l’occasion qui le nous a amené, je ne pense pas que personne le sçache que luy seul. Ce n’est pas qu’il soit fort caché ny retenu à raconter tout ce qui luy est arrivé, mais c’est qu’ayant plusieurs fois commencé, ou il a esté interrompu, ou le temps luy a manqué ? Et je m’asseure, madame, que pour peu que vous fassiez semblant de le désirer, il ne fera pas difficulté de vous le dire, puis qu’il croit estre bien autant obligé à ceux qui le veulent escouter, que luy sçauroient estre ceux ausquels il raconte ses fortunes. – Je pense, adjousta Daphnide, que ce ne seroit point un mauvais divertissement, s’il nous vouloit entretenir, et que le chemin en seroit beaucoup moins ennuyeux, mais pour en venir à bout, il faut que cette belle druide, dit-elle monstrant Alexis, le luy commande.
Alexis qui s’ouyt nommer, et qui prit garde au signe que faisoit Daphnide de la main, pour ne point monstrer qu’elle fust trop attentive à parler avec Astrée, luy demanda si elle vouloit quelque service d’elle, et sçachant par
