Chacun se mit à rire de la chanson d’Hylas ; et parce que Stiliane qui marchoit avec Carlis et Hermante assez pres de luy, avoit escouté attentivement ce qu’il avoit dit : II me semble, Hylas, luy dit-elle, que ceux qui vous accusent d’estre inconstant vous font un grand outrage, puis que jamais homme ne fut plus constant que vous estes, d’autant que dés la premiere fois que je vous vis, vous estiez de la mesme opinion que je vous retreuve. – Que voulez-vous, ma vieille maistresse, que je vous die ? c’est de la misere de nostre siecle qu’il faut que je me plaigne, puis que les hommes et les femmes sont de si peu d’esprit qu’ils ne sçavent recognoistre cette vérité. – Voilà, dict-elle en sousriant, une mauvaise recompense pour le bon office que je vous rends. Vous me nommez vostre vieille maistresse, et ne sçavez-vous, Hylas, qu’il n’y a rien qui offence plus une femme que de l’appeller vieille ? – Je le croy, respondit Hylas, mais, je ne sçay qu’y faire ; le long temps qu’il y a que nous nous cognoissons, est cause de cette injure.
Daphnide qui parloit avec le sage Adamas, oyant rire ceux qui estoient aupres d’Hylas, et desireuse de sçavoir que c’estoit, le demanda à Diane qui estoit assez pres d’elle, et luy en ayant dict le subject : II faut advouer, dit Daphnide, que son humeur est la plus agreable que l’on puisse rencontrer, et que l’on le peut nommer l’unique en son espece, et je croy que toute cette trouppe seroit
