hors du pays, et du reste qu’il laisse faire à eux, qui l’auront bien tost deffait de cet empeschement.
Ceste entreprise estant ainsi résolue, le lendemain il fait assembler tous ceux qui s’estoient trouvez avec luy ce jour-là, et qui avoient attaqué Damon, et leur dict que par l’exprez commandement d’Amasis, il leur commandoit non seulement de se retirer de son service, mais de sortir de toute la contrée dans dix jours, et qu’il estoit bien marry de les traitter de ceste sorte, mais qu’il le faisoit pour obeir, qu’ils n’y manquassent donc point sur peine de la vie, et que toutesfois, ne pouvant perdre la mémoire des bons services qu’il avoit receus d’eux, il leur promettoit de procurer envers Amasis de les remettre en sa grace le plus promptement qu’il pourroit ; et les faire revenir en son service, et que pour leur donner les moyens d’attendre qu’il le peut faire, outre le payement que Amasis leur faisoit des gages de leur service, il leur feroit encore donner du sien propre, la paye de trois lunes entieres, les priant tous de ne se point depiter et sur tout de croire que c’estoit avec un extreme desplaisir qu’il leur faisoit ce commandement, estant plus marry qu’il ne pouvoit leur dire de se veoir separé d’eux, en la valeur et fidélité desquels il avoit toute sorte d’asseurance.
Par ses paroles et par les demonstrations qu’il faisoit d’en estre
