en donner la victoire.
Quant à Amasis, elle en feroit bien quelque demonstration au commencement, si elle sçavoit qui luy auroit osté ce nouvel Adonis, mais incontinent cette colere luy passera, car estant estranger, il n’a point de suite apres luy, je veux dire personne qui se soucie de sa mort ; outre que vous avez assez de prudence pour executer ce que je dis, et sans en parler, et sans que personne s’en doute seulement. Et puis toute chose estant entre mes mains, vous pouvez bien estre asseurez que je ne vous laisseray courre de mauvaise fortune, quoy qu’il puisse advenir de vous. Voyez donc à quoy vous vous resolvez, afin que de mon costé je sçache aussi ce que j’ay à faire, soit pour vous, soit pour moy, en une affaire de telle importance.
Ces solduriers, esmeus de ce discours trop plein d’artifice pour ne se laisser persuader, luy promettent d’entreprendre et d’executer sur l’estranger tout ce qu’il leur avoit proposé ; que, quant à eux, ils n’avoient point d’autre consideration que de luy obeir, et conserver au peril de leur vie sa grandeur et son auctorité, Qu’il ne laissast pas de faire semblant de leur donner congé, et à tous les autres qui se sont trouvez en ceste rencontre, afin que l’on ne prenne pas tant garde à eux, et afin qu’ils ayent le loisir de l’executer sans danger, qu’il leur donne quelque terme de sortir
