point impunie. Damon qui estoit plein de courtoisie, et qui avoit bien souvent passé de semblables hazards, la supplia, si elle le vouloit obliger, de n’en point faire de ressentiment, parce que c’estoit chose qui ne le meritoit pas, outre que l’offence que Polemas avoit receue en la mort de son parent, estoit telle, qu’il estoit bien raisonnable de donner quelque chose à cette naturelle douleur. Et sceut de telle façon représenter cette action à la nymphe, et diminuer tellement la faute que, quoy que Galathée dist le contraire, se sentant infiniment offencée qu’en sa presence cest accident luy fust arrivé, enfin Amasis promit de faire comme Damon le vouloit, ne desirant rien tant que luy rendre toute sorte de satisfaction et de contentement.
Toutesfois, à son retour à Marcilly, elle ne laissa d’en dire à Polémas ce qui luy en sembloit, et de luy faire paroistre combien cette action luy avoit dépleu, dequoy il s’excusa le mieux qu’il peut, disant que ce n’avoit point esté par son commandement, mais que, cependant qu’il s’amusoit à faire relever Argantée, ses solduriers esmeus de juste douleur, avoient pensé devoir vanger sa mort. Amasis qui avoit esté fort bien advertie comme le tout estoit passé, luy sceut bien remarquer sa faute, et celle de ceux qui estoient avec luy, et luy ordonna de chasser de son service
