Il se passa entr’eux plusieurs discours de courtoisie, à la fin desquels elle voulut le faire emporter en litiere en la grande ville de Marcilly, pour le faire penser de ses blesseures avec plus de soing, mais il s’excusa, de sorte qu’elle luy permit de demeurer en ce lieu encores quelques jours. Et cela, il le faisoit pour vivre en plus de liberté, et pour ne vouloir point estre dans le monde, puis que Madonte n’estoit point au monde pour luy, ayant faict resolution qu’aussi tost qu’il auroit consulté l’oracle, et reconduit Galathée vers sa mere, de s’en aller si loing que ny son nom ne fust point cogneu, ny Madonte ne fust point nommée par personne qui la peust cognoistre.
Galathée fut très-aise de voir qu’il n’alloit point à Marcilly, afin d’avoir plus de commodité de demeurer à Mont-verdun aupres de luy, et avec ce pretexte pouvoir estre quelques jours parmy ces bergeres, où elle esperoit d’apprendre quelques nouvelles de Céladon, ou voir pour le moins si cette beauté d’Astrée qui estoit cause que ce berger avoit desdaigné la sienne, la surpassoit, de sorte qu’il l’eust faict avec raison.
Amasis voyant que Damon ne vouloit point bouger du lieu où il estoit, et craignant de les incommoder si elle y demeuroit, la maison n’estant pas fort grande, elle s’en retourna à Marcilly, apres avoir fait plusieurs excuses de la discourtoisie que Polemas luy avoit usée, laquelle elle luy jura de ne laisser
