Page:Urfé - L’Astrée, Troisième partie, 1631.djvu/586

du lict pour l’aller recevoir, ses blesseures n’estans pas telles, qu’il n’eust bien peu le faire sans danger ; mais estant surpris de cette sorte, les excuses seules luy restoient, et les remerciemens d’une si grande faveur : Je suis obligée, dit-elle, de faire d’advantage pour vous, tant pour la proximité qui est entre nous, que pour les obligations que j’ay à la memoire de celuy qui vous a mis au monde qui, au retour que Torrismond, le roy des Visigots, fit aux Tectosages, apres avoir combattu Attila aux champs Cattalauniques, avecque une si grande armée, empescha la ruine de cette contrée, destournant son passage par les Sequanois, par les bas Allobroges, par les Veblomiens, et par les monts des Gebennes, jusqu’en son royaume. Et cette obligation ne fut pas si petite que l’on penserait bien, parce que ce jeune roy, je ne sçay comment, estoit devenu amoureux de l’une de mes nymphes, laquelle ne le voulant point espouser, je ne sçay ce qu’il n’eust faict pour la ravir par force, sur le refus que sans doute je luy en eusse faict. – Madame, respondit le chevalier, tous les hommes sont obligez de servir les dames, et particulierement celles de vostre qualité et de vostre merite. Et mon pere, en vous rendant ce petit service, duquel il vous plaist avoir memoire, a satisfaict au tiltre de chevalier qu’il avoit ; et moy, succedant en sa place, je vous offre et mon sang et ma vie.