demain avec moy l’oracle de ce lieu, j’espere pour vous que vous en recevrez du contentement. Et en cette opinion, je donneray ordre à faire recouvrer tout ce qui sera necessaire pour le sacrifice et pour vous, et pour moy ; cependant, nos chariots et vostre escuyer reviendront, et vous guerirez à loisir. D’une chose vous veux-je prier, qui est de ne me point laisser, que vous ne m’ayez conduicte vers Amasis ma mère, qui, je m’asseure, s’essayera de vous faire toute sorte de bonne chere.
Le chevalier luy respondit : que ç’avoit esté son intention de consulter pour la derniere fois cet oracle, ainsi que desja il le luy avoit dit ; que puis qu’elle luy permettoit que ce fust avec elle, il le recevoit avec beaucoup d’honneur, comme aussi de l’accompagner vers Amasis pour avoir le bon-heur de luy offrir son service. Que, quant à l’esperance qu’elle luy donnoit, il l’esperoit veritablement ; mais par le moyen de la seule mort, laquelle ne le viendroit jamais si tost trouver qu’il le desiroit avec passion.
Cependant Galathée, qui avoit depesché à Bon-lieu vers la venerable Chrisante, pour l’advertir qu’elle y alloit, sceut par le retour de celuy qu’elle y avoit envoyé qu’Astrée, Diane, Phillis et toute la troupe des bergers y avoit disné, et qu’elles s’en alloient vers Adamas visiter Alexis. Ce messager estoit un jeune homme qui avoit esté nourry dés son enfance en son service ; cela estoit cause qu’il avoit une
