rencontré cet escuyer, il sortit de la petite cellule et les emmenant avec luy, nous laissa tous deux seuls.
Ma curiosité ne me permit pas de retarder davantage à luy demander s’il avoit veu Madonte, et ce qu’elle et Leriane avoient dit et fait, et comment il estoit tombé entre les mains de ces gens. Il me respondit fort au long, qu’il avoit accomply les commandemens que je luy avois faits sans y manquer en rien, que tous ceux qui avoit ouy ma mort me regrettoient grandement, et que s’il eust pensé de me trouver en vie, il m’eust apporté la response de ma lettre ; qu’incontinent apres, desireux de me rendre le dernier service, il estoit venu chercher mon corps le long de la riviere, afin de me donner sepulture, en dessein de se retirer apres si loing de ces contrées et des lieux habitez, qu’il n’ouyst jamais parler de chose qu’il eust veue. Et ce matin, suyvant le cours de la riviere, il avoit rencontré ces pescheurs ausquels il s’estoit enquis de ce qu’il alloit cherchant, et qu’eux, apres l’avoir quelque temps considéré, et parlé ensemble assez bas, tout à coup s’estoient jettez sur luy et, l’avoient lié de la sorte qu’il avoit veu, pensant, à ce qu’ils luy reprochoient, que ce fust luy qui m’avoit ainsi traitté ; que toutesfois, quelque demande qu’ils luy eussent faite, il n’avoit jamais voulu dire mon nom, ny chose quelconque qui leur peut faire cognoistre qui j’estois.
