Mais, à ce que je vois c’est vous-mesme qui vous estes voulu procurer la mort, vous mettant en l’estat où vous estes, faute si grande et si execrable devant Dieu et les hommes, que je ne sçay comment il ne vous a chastié en son ire. Car si l’homicide d’un frere et le parricide sont de grandes fautes, parce que le frere et le pere nous sont proches, quel doit estre le meurtre de soy-mesme, puis que nul ne nous peut estre si proche que nous nous sommes ? outre que c’est une action vile et indigne d’un homme de courage, car celuy qui se tue, ce n’est que pour ne pouvoir souffrir les peines de la vie.
Je serois trop long, madame, si je voulois redire icy toutes les remonstrances qu’il me fit, et lesquelles il eust bien continuées davantage, s’il n’eust esté interrompu par les pescheurs, desquels je vous ay parlé, qui entrerent tout à coup dans la chambre, conduisant avec eux un homme attaché de cordes qu’à la verité, je ne cogneuz pas d’abord, tant pour avoir l’esprit distrait ailleurs, que pour estre à contre-jour, outre que son visage effroyé, et ses habits mal en ordre le changeoient et desguisoient grandement. D’abord qu’il me vit, il se voulut jetter à mes genoux, mais il ne peut, parce qu’il estoit attaché. En fin le regardant plus attentivement, et oyant dire coup sur coup comme transporté : Ha ! mon maistre, Ha ! mon maistre ! je le recogneus pour Halladin mon escuyer : Si je fus esbahy de le voir en cest estat, vous le pouvez penser, madame,
