Ce bon-homme, considerant toutes ces raisons, commença de prendre opinion qu’ils disoient vray, et pour le mieux recognoistce, se fit descendre, et s’approcha de moy, et voyant les blesseures si fraisches : Mais m’asseurez-vous, dit-il, que vous estes innocens de ceste mort ? – Nous vous le jurons, dirent-ils, par le guy sacré de l’an neuf. – Vous estes doublement punissables, si c’est vous qui l’avez commis, continua-t’il ; que si vous ne l’avez pas fait, vous ferez bien d’en rechercher les homicides, car sans doute ils ne doivent pas estre loing d’icy, et s’ils ne se trouvent, il est dangereux que vous n’en soyez accusez. Et parce que je ne voudrois que des innocens eussent du mal, ny que des malfaicteurs demeurassent impunis, dictes-moy où sont les habits qu’il avoit quand vous l’avez trouvé ? Eux alors, comme si desja ils eussent esté entre les mains des juges, sans plus se souvenir de la resolution qu’ils avoient faicte, luy representerent non seulement ce qu’il demandoit, mais aussi tout ce qu’ils avoient trouvé, fust de l’or, ou des bagues.
Alors le bon druide : Je croy veritablement, dict-il, que vous estes innocens, puis que si librement vous monstrez ces choses precieuses, et soyez certains que Dieu vous aydera, soit en ceste occasion, soit en toute autre, tant que vous vivrez en cette preu-d’homie. Et soudain se jettant à genoux, et leur faisant signe qu’ils en fissent de mesme :
