encores tout vermeil, car de temps en temps il en sortoit tousjours quelque goutte. Mais quand il fut arrivé, et qu’il vid les blesseures toutes fraisches et toutes sanglantes, il commença de les reprendre rudement, et de les menacer du chastiment de Dieu et des hommes : Pensez-vous, mal-heureux que vous estes, leur dict-il, que quand vous cacheriez ce corps dans le centre de la terre, la justice de Tautates ne le fasse pas descouvrir à la veue de tous ? Et pensez-vous que la vengeance que ce sang crie devant son throsne ne vous atteigne en quelque lieu de l’univers où vous puissiez vous enfuyr ? Combien estes vous insensez, pour un misérable gain qui vous trompe, d’avoir commis une si exécrable meschanceté ?
Eux qui n’estoient pas meschans, comme ils le monstrerent bien depuis, et portoient un très-grand respect à ce druide, se jetterent à genoux devant luy, l’asseurant qu’ils estoient innocens de ce sang, luy raconterent comme ils m’avoient retiré de l’eau, et quel estoit leur dessein, qu’il pouvoit bien juger que les blesseures qu’il voyoit en ce corps ne pouvoient estre faictes sans armes, et qu’ils n’en avoient point, et que quand ils l’avoient veu venir vers eux, s’ils eussent faict ceste meschanceté, ils s’en fussent fuys aisément et passé de l’autre costé du fleuve pour se sauver, mais qu’ils l’avoient expressement attendu pour leur justification, en cas qu’à l’advenir l’on les en voulust accuser.
