ayant encores la memoire si fraische. Et toutesfois Calidon ne laisse pas de l’esperer, et se tient le plus près d’elle qu’il luy est possible. Quant à Thamire, il vid le plus heureux et content du monde, et dit que les blesseures du visage de Celidée estant des tesmoignages de sa vertu, la luy rendent si belle et si aimable ; qu’il ne sçait s’il doit desirer qu’elle fust autrement. Et en ce contentement, il est si satisfait qu’il ne la peut esloigner d’un pas ; je suis bien marrie qu’elle nee soit icy pour avoir l’honneur, toute laide et defigurée, qu’elle est, de vous faire la reverence. Mais Astrée, Diane, Phillis et les autres bergeres des hameaux voisins sont cause qu’elle n’y est pas, l’ayant depuis hier conviée d’aller de compagnie visiter la fille d’Adamas, qui ne fait que de revenir d’entre les vierges druides des Carnutes, et que l’on tient pour l’une des plus belles filles et des plus discrettes de toute la contrée. – Peut-estre, dit Galathée, reviendra-t’elle ce soir, et nous pourrons bien la voir encores. – Je le voudrois, respondit Cleontine, mais j’ay grand peur que Thamire qui l’a accompagnée, ne soit cause du retardement, car pour peu qu’il soit tard, il ne la laissera pas mettre en chemin, ayant trop de soing de sa santé ; outre que j’ay sceu que la venerable Chrisante vouloit aussi estre de la partie et qu’elles la sont allée prendre à Bon-lieu, pour toutes ensemble faire cette visite.
Ainsi alloit discourant Cleontine, et sans
