des deux choses que vous me demandez, je satisferay à l’une maintenant, et remettray s’il vous plaist l’autre jusques à ce que nous soyons à Mont-verdun. – Ce sera donc, adjousta Galathée, avec condition que vous m’accorderez encores une chose que je vous demanderay. – Il n’y a rien, repliqua le chevalier, que vous ne me puissiez commander, et à quoy je ne satisfasse de tout mon pouvoir.
Et à ce mot, haussant la visière de son heaume, il parut fort beau. Il estoit jeune, et la peine du combat et reschauffement de la visiere abbatue à cause de l’haleine, luy avoit donné une si vive couleur, qu’on ne recognoissoit point en son visage la tristesse qu’il avoit dans l’ame. Et cela fut cause qu’elles le trouverent toutes si beau qu’elles desirerent avec plus d’impatience de sçavoir qui il estoit, et n’eust esté qu’ils virent venir la vieille Cleontine avec une bonne troupe de ses filles druides et quelques Vacies et Eubages, il est certain qu’elles ne luy eussent point donné de delay, et qu’il eust fallu dire, non seulement son nom, mais quelle fortune l’avoit conduit icy, ce que Galathée ne luy cela pas, mais il respondit : Voyez-vous, madame, comme l’on ne doit jamais desespérer de l’assistance du Ciel, et mesme quand on a la raison de son costé.
Cependant qu’ils parloient ainsi, la sage Cleontine se trouva si pres, que Galathée s’avançant un
