prier Adamas de vouloir venir en leur hameau faire le sacrifice qu’il avoit promis pour l’action de graces du Guy salutaire, elle tira à part Diane, Phillis, Celidée, Stelle, et les autres bergeres, et leur proposa qu’il luy sembloit qu’ayant eu ceste grace de Tautates, d’avoir en leur hameau le Guy sacré, il ne falloit pas estre paresseuses de l’en remercier, parce que cela les rendroit indignes de la continuation de ses graces. Et puis que leurs bergers en estoient desja venus prier le druyde, elles se monstreroient trop nonchalantes si, avant que de partir pour s’en retourner, elles ne joignoient leurs supplications aux prieres qu’ils avoient faictes ; et que mesme, afin de ne point differer davantage une si bonne œuvre, il falloit essayer de l’emmener avec elles en s’en retournant.
Il n’y en eut une seule qui n’approuvast ce qu’Astrée avoit dit, et après avoir consideré qui d’entr’elles seroit bonne à faire la prière pour toutes, elles furent d’advis que Diane, accompagnée de toutes, luy en porteroit la parole, ce qu’elle accepta, encores qu’elle en fist au commencement quelque difficulté ; et sans dilayer d’advantage, s’approchant d’Alexis, elles luy firent entendre qu’elles desiroient de parler au sage Adamas, et qu’elles la supplioient que ce fust par son moyen.
Alexis qui ne sçavoit ce que c’estoit ; s’approchant d’Adamas, luy fit sçavoir le désir de ces discrettes bergeres, et en mesme temps Diane luy fit la supplication
