mieux que je ne le sçaurois dire, mais cela n’empesche pas qu’il ne me reste encores assez de maux pour m’arracher de la bouche les plaintes que je fais ; car je suis comme le pauvre malade, que mille sortes de douleurs affligent tout à coup, encores que l’on luy en oste quelques-unes, il luy en reste tant d’autres que les plaintes justement luy peuvent bien estre permises.
Le druide luy vouloit respondre lorsqu’il vid venir Paris, car de peur qu’il n’entendist leur discours, et que par ce moyen il recogneust que ceste Alexis déguisée n’estoit pas sa sœur, il fut contraint de remettre à une autre fois ce qu’il luy vouloit dire. Et cependant la prenant par la main, et se mettant entre elle et Leonide, il commença de se promener parmy ce bocage, feignant de n’avoir point veu Paris, qui arriva presque en mesme temps, mais si propre en ses habits de berger, qu’il estoit aisé à cognoistre qu’Amour avoit esté celuy qui ce matin l’avoit habillé. Il est vray que s’il y avoit esté soigneux, Leonide qui en se flattant avoit opinion que sa beauté ne devoit guere ceder à celle d’Astrée, n’y avoit pas espargné l’artifice ny tous les avantages qu’elle se pouvoit donner, afin qu’Alexis la voyant ainsi parée, et faisant comparaison d’Astrée à elle, la simplicité de l’habit de la bergere ternist en quelque sorte sa beauté naturelle. Alexis seule, vestue comme de coustume, sembloit
