Hylas, cela me suffit, car de dire qu’elle changera incontinent apres, mon amy Silvandre, luy dit-il en luy donnant d’une main sur l’espaule, qu’elle se haste tant qu’elle pourra, je luy pardonne, si elle change plustost que moy, et si de fortune elle me devance, sois asseuré que je l’auray bien tost attrapée.
Plusieurs ouyrent ceste response, parce que Hylas parloit fort haut, et cela fut cause que chacun en rit, de sorte que ce discours les entretint jusques dans la maison où les tables se trouvant couvertes d’abondance de vivres, chacun s’y assit comme le soir auparavant.
Durant tout le repas, l’on ne parla presque que de l’humeur d’Hylas, et pour luy donner sujet de parler, il y en avoit tous-jours quelqu’un qui soustenoit son party. Et Stelle entre les autres qui encores qu’elle le fist en apparence pour plaire à la compagnie, toutesfois aussi ce n’estoit pas contre son humeur, ayant toute sa vie suivy les regles de ceste doctrine. Et Corilas qui en avoit autresfois ressenty les effects, l’oyant de telle sorte fortifier le party d’Hylas : Je voudrois bien, dit-il, s’adressant à Silvandre, te faire une demande, si tu l’avois agréable. Et puis continua : Dy moy, berger, je te supplie, est-il vray que l’amour naisse de la sympathie. – Tous ceux, respondit Silvandre, qui en ont parlé, disent qu’ouy. – Or, reprit Corilas, je suis donc le seul qui croit le contraire, et s’ils sont fondez sur
