quand une fois l’on a donné de l’aisle dedans. – Madame, répliqua la bergère, ceste beauté n’est pas en moy, mais quand elle y seroit, j’espère que ma resolution, sera encores plus forte que toutes les violences, ny les opiniastretez de l’amour. Et c’est ce que je voulois vous dire, car sçachez que plustost je me donneray mille fois la mort, si autant de fois je pouvois revivre, que de me marier jamais, puis que le Ciel, ou plustost la mauvaise fortune l’a voulu.
A ce mot, elle s’arresta pour prendre son mouchoir pour s’essuyer les yeux, parce qu’elle ne peut retenir ses larmes. Et voulant reprendre son discours, la survenue d’Adamas l’en empescha, qui de fortune entrant dans la chambre, et y trouvant cette bonne compagnie, fut bien marry de l’avoir interrompue, n’y ayant rien qu’il desirast plus que de voir Alexis et Astrée ensemble, pour l’espérance qu’il avoit que ceste pratique remettroit Alexis en son premier estat, et que, par ainsi, suivant la parole de l’Oracle, il verroit sa vieillesse contente et bien-heureuse.
Toutesfois, feignant de l’avoir fait expres, il dit à Alexis, apres avoir salué toutes ces bergères : Et quoy, ma fille, vous voilà encore au lict, et que diront ces belles filles de vous voir si paresseuse ? – Mon père, respondit Alexis, la faute en est à ma sœur qui les a amenées icy sans m’en advertir. – La faute, répliqua Adamas, en est vostre, qui estes encores dans la plume, mais si elles me
