ne me décelez point, car peut-estre, si Adamas scavoit que je vous eusse donné cet advis, il m’en scauroit mauvais gré, et cela pourroit estre cause qu’il en feroit quelque difficulté, il n’est pas aussi nécessaire qu’Alexis le scache, parce qu’elle est d’humeur si retirée qu’elle n’a jamais plus de contentement que quand elle est seule. Je ne me soucie guère que Paris l’entende, sçachant assez qu’il se plaist si fort en vostre compagnie, que ce ne sera jamais luy qui y contrariera. – Je ne dementiray jamais, respondit Paris, l’opinion que vous avez de moy.
Alors Astrée, après avoir un peu sousri contre Diane et Phillis : Pensez-vous, madame, dit elle, qu’Adamas ne nous refuse point ou bien qu’il y laisse venir Alexis ? car il est très certain que si tout le reste du monde y venoit, et qu’Alexis seule y deffaillist, je serois de trop mauvaise humeur et faudroit que je m’allasse cacher pour ne point ennuyer là compagnie. – Vous voyez, interrompit Phillis, comme les bergères du Lignon ne sont point dissimulées. Je vous jure, madame, qu’elle ne ment nullement. – Elle, et toutes les autres, reprit Leonide, en sont plus estimables, mais d’où vient ceste grande amitié ? – Dieu voulut, adjousta Astrée, que ce fust de sympathie, parce que mal-aisément pourroit-elle estre de mon costé, qu’elle ne fust aussi du sien, et si cela estoit, je m’estimerois la plus heureuse qui fust jamais. – S’il ne faut que
