Tout (mon serviteur) n’est qu’une vaine ombre du bien que nous nous figurons, et toutesfois, encores que nous en recognoissions, et vous et moy, la vérité, parce que par le commun consentement de tous, il est jugé autrement, ny vous ny moy, ne voulons point estre la première à rompre ceste glace. Et cela me fait ressouvenir du conseil des Rats, qui résolurent que pour leur seureté il falloit attacher au col d’un chat qui devoroit, une sonnette, afin de l’ouyr, quand il marcheroit ; mais il ne s’en trouva point d’assez hardy en toute la troupe, qui l’osast entreprendre.
Discourant de ceste sorte, ces belles bergères s’habillèrent, et Astrée, sans sçavoir pour quel dessein, se coiffa et s’habilla avec plus de soing qu’elle n’avoit faict depuis la perte de Céladon, à quoy Phillis prenant garde, elle ne peut s’empescher de sous-rire, et la monstrant à Diane : Ma maistresse, luy dict-elle, je ne sçay si les bergères de Lignon sont de cette humeur. – Et de laquelle, dit Diane, voulez-vous parler ? – Je voy, continua Phillis, qu’Astrée se donne plus de peine à s’agencer que de coustume. Quant à moy, je n’en puis trouver autre raison, sinon la nouvelle amour de cette belle druide, et qui n’a eu naissance que depuis hier. Dites-moy, je vous supplie, si c’est l’humeur des bergères de Lignon de s’affectionner si promptement, et plustost des bergères que des bergers.
Astrée respondit : Il est
