Quoy que ce soit, en moy ne fais point ta retraicte,
O sotte loyauté qui nous va decevant !
Si j’aime, mon amour ressemblera le vent
Qui vit tant qu’il se meut, et meurt quand il s’arreste.
SILVANDRE
Au contraire, en mon cœur viens selon ta coustume,
O foy, l’heur et l’honneur d’un veritable amant !
J’estime en fin l’amour comme le diamant,
D’autant plus qu’il ne craint les marteaux, ny l’enclume.
Chapitre 4
Cependant que ces bergers chantoient de ceste sorte et que le reste de la compagnie estoit attentive à les escouter, Paris qui ne vouloit perdre ceste commodité, s’approchant encores davantage de Diane : Fut-il jamais, luy dit-il assez bas, une plus agreable humeur que celle d’Hylas ? – Je croy, respondit la bergere, qu’il n’y a point de difference entre luy et la pluspart des autres, sinon qu’il dit plus librement son intention. – Comment, repliqua incontinent Paris, auriez-vous bien ceste mauvaise opinion des hommes et les estimeriez-vous bien aussi inconstans que luy, sans y mettre autre difference que le taire ou le dire ? – Je n’ay
