ne la puis eviter, et qu’il n’y a vie qui soit plus desirable.
Cette dispute eut bien plus longuement duré entre ce berger et cette bergere, n’eust esté qu’ils virent desja assez pres d’eux une grande trouppe, qui se venoit assembler au carrefour de Mercure, pour de là s’en aller tous ensemble voir Alexis. Et parce que pour se desennuyer ils alloient chantant tour à tour, Silvandre se teut pour escouter un berger, qui disoit tels vers, et lesquels il sembloit que Diane fust bien aise d’escouter, tant pour la douceur de la voix de celuy qui les chantoit, que pour mettre fin à leur discours avant que toute la trouppe fut arrivée.
Stances
Contre une bergere inconstante.
I
Esprit plus dangereux que la mer n’est à craindre,
Et de qui l’amitié m’apprend à desaimer ;
N’esperez que vos feux puissent plus r’allumer
Ce qu’ils peurent estaindre ;
C’est un peu sage nocher,
Qui battu de mesme orage,
Contre le mesme rocher
Se perd d’un second naufrage.
