vaincre ceste belle dame, ne s’arresta pas au premier refus qu’elle luy fit, un jour qu’Euric s’estoit allé promener sur le Rosne, et, pour passer le temps en meilleure compagnie, avoit convié une partie des dames, entre lesquelles nous estions, Clarinte et moy, ja pris garde qu’Alcidon s’en approcha, et, apres avoir parlé quelque temps à elle, je vis qu’il luy donna un papier qu’elle prit, et incontinent apres le despliant, le rompit et le jetta dans le fleuve sans le lire. Je ne peus pour lors entendre ce qu’il luy avoit dit, ny ce qu’elle luy respondit, parce que j’estois trop esloignée et qu’ils parloient fort bas. Mais Alcidon me dit depuis qu’il luy avoit dit :
Ne trouvez estrange, madame, si je viens tenter en ce lieu ce que je n’ay peu obtenir ailleurs, je veux dire l’honneur de vos bonnes graces, parce qu’ayant esté si malheureux quand je vous en ay suppliée sur la terre, je veux essayer si l’element de l’eau me sera point plus favorable. Et d’autant que, quand je vous vois, mon ame s’employe tellement à vous regarder qu’elle oublie de parler, pour suppléer à ce deffaut, j’ay mis dans ce papier une partie des choses que je voudrois bien, et que je ne puis vous dire.
Et à ce mot, il le luy presenta. Elle, qui eut peur qu’en le refusant, elle ne fust cause que plusieurs s’en prinsent garde, le receut, et luy dit : Vous avez eu raison, Alcidon, de penser que cet element vous seroit plus favorable que l’autre, s’il est
