pourrez, et cependant de vous reculer encor un peu plus, de peur que, si les flambeaux estoient encore allumez, vous ne fussiez veu quand la porte s’ouvrira.
Amintor le fit, ne pensant point à sa finesse, qui ne tendoit à autre fin qu’à l’esloigner davantage de la porte du cabinet, de peur qu’il ne peust s’appercevoir de sa ruse. S’estant donc approché le plus doucement qu’il peut de cette porte, il ouvrit luy-mesme celle qui alloit dans la grande sale, et, y entrant, la referma incontinent apres, parce que le ressort estoit fait de telle façon qu’en la poussant elle se fermoit d’elle mesme ; et Alcyre, qui l’avoit remarquée, y estoit venu un peu auparavant, et l’avoit laissée entr’ouverte. Amintor, qui l’ouyt ouvrir et fermer incontinent, eut opinion que veritablement c’estoit celle du cabinet de Clarinte, et il est bien croyable que tout autre y eust esté aussi bien trompé que luy, estans si proches l’une de l’autre, et le lieu si obscur. Toutesfois, pour en estre plus asseuré, il vint prester l’oreille à la porte pour ouyr s’ils parloient ou feroient quelque bruit. Mais, où fust que veritablement, au bruit qu’Alcyre avoit fait, quelqu’un s’esveilla dans la chambre de Clarinte, ou que l’apprehension le luy fist sembler ainsi, tant y a qu’il eut opinion d’ouyr quelque bruit, ce qui le transporta de sorte qu’il fut prest plusieurs fois d’enfoncer la porte à coups de pied. Enfin, se souvenant de la parole qu’il avait donnée, et de la proximité
